பாகிஸ்தான், ஆப்கன் எல்லை பகுதியான இந்துகுஷ் பகுதியை மையமாக கொண்டு இந்த நில நடுக்கம் மதியம் 2.42 மணியளவில் உணரப்பட்டது . இந்த நிலநடுக்கம் பாகிஸ்தானில் 8.1 ரிக்டர் அளவாகவும், காஷ்மீரில் 7. 7 ரிக்டர் அளவாகவும் பதிவாகியது. பூமிக்கடியில் 190 கி. மீட்டர் ஆழத்தில் இந்த நில நடுக்கம் உருவாகியதாக புவியியல் ஆராய்ச்சி மையம் தெரிவிக்கிறது .
இதன் காரணமாக காஷ்மீர், பாகிஸ்தானில் பெரும் சேதம் ஏற்பட்டிருக்கும் என அஞ்சப்படுகிறது இருப்பினும் அதிகாரப்பூர்வ தகவல் வரவில்லை. ஜம்மு காஷ்மீரில் தொலைபேசி சேவை , மின்சாரம் முற்றிலும் தடைபட்டுள்ளது .
இந்த நிலநடுக்க பாதிப்பு டில்லியில் நில அதிர்வாக உணரப்பட்டது. வட மாநிலங்களான ராஜஸ்தான் , பஞ்சாப் , இமாச்சல் பிரதேசம், உத்தர்கண்ட் மகாராஷ்ட்டிரா ஆகிய மாநிலங்களிலும் நில அதிர்வு உணரப்பட்டது 2 நிமிடம் இந்த அதிர்வு உணரப்பட்டதாக கூறப்படுகிறது. நில அதிர்வு ஏற்பட்டதால் வீடுகள் மற்றும் அலுவலகங்களில் இருந்து மக்கள் வெளியேறினர். டில்லியில் மெட்ரோ ரயில் சேவை பாதிக்கப்பட்டது . இந்த நிலநடுக்கத்தால் வட மாநில மக்கள் பீதியில் உறைந்தனர்.
நிலநடுக்கம் ஏற்பட்டதை அடுத்து தேசிய பேரிடர் மீட்பு குழுவினர் அலர்ட் செய்யப்பட்டுள்ளனர் .
